Bonjour, savez, mes gins.
Et alors, tout i va bin d’puis l’dernier queop ? Z’avez passé eine beonne karmesse ?
Feaut dire que l’victoire, l’saim’di au soir conte Erpion, elle a fait du bin, surtout pou l’restant du wékène…
Ah cha, i-a fallu aller l’querre, mais final’mint, elle éteot bin méritée. Surtout qu’in face, ch’n’éteot pos des malingampes !
L’intraineu i l’aveot dit qu’i falleot laicher du temps à no n’équipe pou qu’elle moute s’savoir-faire. Et cha comminche à v’nir.
Surtout que l’sémaine passée, on aveot quasi gagné à Goss’lies. A n’eine paire de minutes près, l’affaire i-éteot dins l’sa. Asteur faudra attinte pou vir c’que l’Comité Provincial i va décider.
Dis hardimint, i n’se passe pos eine saiseon sans qu’y a eine séquoi qui nous cait d’ssus.
Ceulle feos-chi, avec eine milette de sanche, on s’in sortira bin.
N’impêche que pou no comarate qu’i-a s’nez esquinté, i s’souvenn’ra de c’déplach’mint !
Inter-nous, je n’saveos pos qu’Zidane i-aveot de l’famile à Charleroi.
Mais je m’rappelle bin que quand ç’qu’on alleot jeuer là-vas avec l’Unieon, ch’n’éteot jamais eine partie d’riache.
Infin, tout cha i-est passé et à ç’soir, ch’t’ein derby d’Wallonie Picarte qui nous attind : ch’est Ellezelles qui débarque au Varenne.
Et cha nous promet seûr’mint ein match pus calme que l’sémaine passée. In puque, les gins de l’régieon des Collines i seont bramint sympathiques.
Alors, eine beonne soirée à vous-z’éautes tertous et que l’meilleu i gagne. Et surtout beon amus’mint car ein match, ch’t’avant tout eine fiête !
Allez, à l’feos qui vient, mes gins !
